Konan og drekinn – Myndlistasýning

Konan og drekinn
Myndlistarsýning fléttuð saman með ævintýralegri sögu.
Deiglan, Akureyri
13. – 14. nóv / 20. – 21. nóvember kl. 14 – 17

Sýningin samanstendur af málverkum og sögu. Sagan sem fylgir með málverkunum fjallar um konu sem áttar sig á því að þótt hennar daglega líf sé harla gott þá þyrstir hana í eitthvað meira. Frelsið kallar á hana og hún leggur af stað í ferðalag. Á leiðinni safnar hún þekkingu og reynslu og finnur ýmislegt sem veitir henni meiri lífsfyllingu. Hún upplifir líka á eigin skinni að lífið á það til að ganga í bylgjum, ýmist upp eða niður. Á uppleiðinni ríkir gleði og tilhlökkun en á niðurleiðinni taka erfiðari tilfinningar við og þá getur verið snúið að halda dampi. Á vegferðinni hittir konan dreka og á við hann djúpstætt samtal sem verður til þess að hún öðlast meiri sjálfsþekkingu. Sagan er í raun hetjuför konunnar frá landi hins þekkta yfir í land hins óþekkta, ævintýrið. Hún heyrir kall frelsisins og leggur af stað, sigrast á erfiðleikunum og kemur til baka með gjafir sem nýtast ekki einungis henni heldur líka samferðamönnum hennar.

Markmið sýningarinnar er vitundarvakning, að vekja fólk til umhugsunar, til vitundar um hversu mikill fjársjóður býr í hverju og einu okkar. Hvað gerist þegar við prófum að stíga út fyrir okkar hversdagslega líf og opna fyrir eitthvað nýtt? Með sýningunni langar mig að hvetja fólk til að sýna hugrekki til að opna eigin fjársjóðskistu og treysta flæðinu sem fylgir sköpunarkraftinum.

Listakonan Ósk Sigurðardóttir hefur brennandi áhuga á að hjálpa öðrum að gera lífið skemmtilegra og innihaldsríkara. Hún útskrifaðist úr grafískri hönnun frá Myndlistaskólanum á Akureyri og starfar sem leikskólakennari, jógakennari og markþjálfi. Í leikskólanum nýtur hún þess að leiða börnin í jóga, listsköpun og hreyfingu. Í markþjálfasamtölum aðstoðar hún fólk við að koma löngunum sínum í orð og móta aðgerðir til að stefna í átt að draumunum og njóta lífsins á vegferðinni. Jógaiðkunin og kennslan er Ósk mikilvæg leið til þess að gefa sjálfri sér og öðrum tækifæri til að eiga stund í núvitund til þess að sinna huga, líkama og sál. Listsköpunin er henni dýrmæt útrás og leið til vaxtar í gegnum flæði þar sem útkoman skiptir ekki máli, einungis það að njóta.